Friday, November 16, 2007

അന്യോന്യം

ടാര്‍നിലത്തെ
കറുത്തുണങ്ങിയ ചോര
കണ്ടാല്‍
ചങ്ങാതീ
നിന്നെയാണോര്‍മ്മ വരിക.
മരണത്തെക്കുറിച്ചോര്‍ക്കുമ്പോള്‍
നീ മുന്നില്‍
കാണുന്ന മുഖം
എന്റേതാവാതെ
വയ്യല്ല്ലോ.
എങ്കിലും ഇനി കാണുമ്പോള്‍
പതിവുള്ള ആ ചിരി
നാം വേണ്ടെന്നുവയ്ക്കരുത്.

Tuesday, November 13, 2007

ഒരേ കടല്‍... തിരയും





ഇറങ്ങിപ്പോയിട്ട്



തിരിച്ചുവരുന്നത്

വേറൊരു കടലെന്ന്...,
വെറുമൊരു തിരയെന്ന്...
ഓരോ തിരയും
ഓരോ കടലെന്ന്..
ഇക്കാണായ കടല്‍ മുഴുവന്‍
ഒരൊറ്റ തിരയെന്ന്,
ഇത്ര വലിയൊരു കടലിനെ
പറയുമ്പോലെ
എത്രയൊക്കെ പറയാം
ഒരു നിമിഷം
കണ്ടുമറഞ്ഞുവെന്ന്
കരുതിപ്പോയ
വെറുമൊരു
തിരയെപ്പറ്റിയും...

Saturday, November 03, 2007

എലിയും പൂച്ചയും


സത്യം,

നേരം പോക്കിന്

തട്ടിക്കളിക്കാന്‍ ഒരു

കളിപ്പാട്ടം മാത്രമേ ചോദിച്ചിട്ടുള്ളൂ നീ.

കൈയിലിരുന്ന

ജീവിതത്തെ

നിനക്കു മുന്നിലേക്ക്

ഇട്ടുതന്നപ്പോള്‍

എലിയെയും പൂച്ചയെയുമെങ്കിലും

ഓര്‍ക്കാമായിരുന്നു

എനിക്ക്.

ഇനി,

അവസാനശ്വാസം വരെ,

ഇങ്ങനെ ഒരു നഖപ്പാടില്‍ നിന്ന്

മറ്റൊന്നിലേക്ക്

മാറിക്കൊണ്ടേയിരിക്കാം.

നിലവിളിക്കുമ്പോള്‍

നിന്റെ ചിരിയെക്കാള്‍

ഉച്ചത്തിലാകാതെ

നോക്കാം.